ამერიკის შეერთებულმა შტატებმა ირანული გემების 5 კაპიტანს სანქციები დაუწესა ვენესუელაში ნავთობის ჩატანის გამო - ამის შესახებ აშშ-ის სახელმწიფო მდივანმა მაიკ პომპეომ განაცხადა.
„დღეს, შეერთებული შტატები სანქციებს უწესებს ირანული გემების 5 კაპიტანს, რომლებმაც დაახლოებით მილიონნახევარი ბარელი ირანული ბენზინი ვენესუელაში ჩაიტანეს არალეგიტიმური მადუროს რეჟიმის მხარდასაჭერად. ამ კაპიტნების აქტივები დაიბლოკება და ისინი ვეღარ შეძლებენ აშშ-ის ტერიტორიულ წყლებში ოპერირებას. საზღვაო პირები, რომლებიც საქმიან ურთიერთობებს აწარმოებენ ირანთან და ვენესუელასთან, აშშ-ის მხრიდან შესაბამისი ზომების წინაშე აღმოჩნდებიან“,- განაცხადა პომპეომ პრესკონფერენციაზე.
მან აქვე აღნიშნა, რომ შეერთებული შტატები აგრძელებს ვენესუელის ოპოზიციური ლიდერის ხუან გუადიოს მხარდაჭერას.
ცნობისთვის, აშშ-სა და ვენესუელას შორის დიპლომატიური ურთიერთობები გასულ წელს გაწყდა. აშშ და კიდევ 60-მდე ქვეყანა ნიკოლას მადუროს ვენესუელას პრეზიდენტად არ ცნობს და ისინი გარდამავალ პრეზიდენტად ოპოზიციის ლიდერს ხუან გუაიდოს აღიარებენ. მადუროს მხარდამჭერები არიან: რუსეთი, ჩინეთი, სირია და კუბა.