რა საოცარია, ყალბი ამბების გავრცელებასა და ამ ამბებისგან თავის დაცვაზე რომ მმართველი პარტიიდან გველაპარაკებიან, - ასე მიმართა დამოუკიდებელმა დეპუტატმა ეკა ბესელიამ უმრავლესობის დეპუტატ დავით მათიკაშვილს პარლამენტის პლენარულ სხდომაზე მას შემდეგ, რაც მათიკაშვილმა სახალხო დამცველს ყალბი ახალი ამბების შესახებ დაუსვა კითხვა.

ეკა ბესელიამ დავით მათიკაშვილს ყალბი ახალი ამბებისგან თავის დასაცავად ტელეკომპანია „იმედის“ ყურება ურჩია.

„რა საოცარია, ყალბი ამბების გავრცელებასა და ამ ამბებისგან თავის დაცვაზე რომ მმართველი პარტიიდან გველაპარაკებიან. დავით მათიკაშვილს როგორ უნდა დაიცვას თავი ვუთხრათ - „იმედზე“ გადართე და მოძებნე გია აბაშიძე, ერთ-ერთი საოცარი მეზღაპრე, რომელიც ამ ყალბ ამბებს ისეთი საოცარი რომანტიულობით გვიყვებოდა, ვაკის პარკში რომ დასეირნობდა და მეორე დღეს მეორე ხმაში სოფო კილაძე რომ გამოვიდოდა და იგივეს იმეორებდა. გია აბაშიძე მე „ქართული ოცნების“ შტაბში რომ მყავს ნანახი ჩემი თვალით, „იმედის“ წამყვანად როგორ გიყვებათ ნამდვილ ამბებს? ის მოიკითხეთ და მერე ერთმანეთთან გაარკვიეთ ეგ აბები. საერთოდ რაღაცას რომ ამბობთ, ცოტა შუბლზე ხელი მოისვით, შუბლის ძარღვი საერთოდ გაქვთ თუ არა,“ - აღნიშნა ბესელიამ.