დევნილთა, ეკომიგრანტთა და საარსებო წყაროებით უზრუნველყოფის სააგენტომ ბოლო ერთი წლის განმავლობაში, სოფლად სახლი 734 იძულებით გადაადგილებულ ოჯახს შეუსყიდა. ამის შესახებ „ინტერპრესნიუსს“ დევნილთა, ეკომიგრანტთა და საარსებო წყაროებით უზრუნველყოფის სააგენტოდან აცნობეს.

„სააგენტოს დირექტორმა ბესარიონ სიმონიშვილმა, ზუგდიდისა და სენაკის მუნიციპალიტეტებში დევნილი ოჯახებისთვის გადაცემული სახლები, სამეგრელო-ზემო სვანეთის მხარეში სახელმწიფო რწმუნებულის მოადგილე დავით ვერავასა და სენაკის მუნიციპალიტეტის მერ ლევან კუპრეიშვილთან ერთად, დაათვალიერა. „სოფლად სახლის“ პროექტის ფარგლებში, დევნილმა ოჯახებმა თავად შეარჩიეს სახლები, რომლებიც კრიტერიუმების დაკმაყოფილების შემდეგ, სააგენტომ მათთვის შეისყიდა. მნიშვნელოვანია, რომ სახლების უმეტესობას თან ახლავს მიწის ნაკვეთები, რაც დევნილებისთვის შემოსავლის დამატებით წყაროს წარმოადგენს. 2020 წლის ბოლომდე, სააგენტო იძულებით გადაადგილებულ ოჯახებს დამატებით 700 სახლს შეუსყიდის”, - ნათქვამია ინფორმაციაში.