ადვოკატ მზია ქასრაშვილის ინფორმაციით, გიორგი შაქარაშვილის საქმეზე მისი დაცვის ქვეშ მყოფი ვახო ახვლედიანი დაზარალებულად ცნეს. როგორც მან მცხეთაში, ჟურნალისტებთან საუბრისას განაცხადა, მისი დაცვის ქვეშ მყოფი დაზარალებულად ცნეს და დადგენილებას დაზარალებულის თაობაზე ხელი მოაწერეს.
„მას ცხვირი და შუბლი აქვს გატეხილი. მან ეს დაზიანებები მეორე ეპიზოდში მიიღო. ვინ მიაყენა დაზიანებები ვერ ასახელებს, იმიტომ, რომ ღამე იყო და თუ ტელეფონით ან მანქანის შუქით არ გაანათებდა, ვერ დაინახავდა. ვიღაცამ ჩაარტყა, არ ვიცი მუშტი იყო თუ ხელში რაიმე ჰქონდა", - განაცხადა მზია ქასრაშვილმა.
შეგახსენებთ, რომ 19 ივნისს, დაახლოებით 11:00 საათზე, გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები. 4-დღიანი საძიებო სამუშაოების შედეგად, მყვინთავებმა ფეხბურთელ გიორგი შაქარაშვილის ცხედარი წყალში იპოვეს.
საქმეზე გამოძიება საქართველოს სსკ-ის 225-ე, 143-ე და 126-ე მუხლებით მიმდინარეობს.