დემოკრატიის ყოველწლიური კონფერენციის (#GEODEM) მეორე პანელი 1-ელ ივლისს გაიმართება.
პანელის თემაა: "საერთაშორისო აქტორები და არჩევნები".
დემოკრატიის ყოველწლიური კონფერენციის (#GEODEM) რიგით მე-5 გამოშვება, თბილისში, საქართველოს პოლიტიკის ინსტიტუტმა (GIP) აპრილის თვეში დაგეგმა, თუმცა, COVID-19-ის გავრცელების გამო, ყველა დაგეგმილი ღონისძიება ონლაინ სივრცეში გადავიდა.
როგორც „ინტერპრესნიუსს“ საქართველოს პოლიტიკის ინსტიტუტიდან აცნობეს, წლევანდელი ღონისძიების მთავარი თემა – „საქართველო არჩევნების წინ: როგორ ავირიდოთ თავიდან დემოკრატიის უკუსვლა?“ იქნება.
მათივე ცნობით, ეპიდემიოლოგიური მდგომარეობიდან გამომდინარე, საქართველოს პოლიტიკის ინსტიტუტმა (GIP) გადაწყვიტა, #GEODEM2020 ვებინარის ფორმატში ჩაატაროს და აუდიტორიას 3 სხვადასხვა პანელისგან შემდგარი კონფერენცია შესთავაზოს.
„პანდემიამ ახალი გამოწვევების წინაშე დააყენა მომავალი საპარლამენტო არჩევნები. შესაბამისად, კონფერენციის ძირითადი თემაც შეიცვალა და წელს, სამი თემატური პანელი ამ საკითხზე ფოკუსირდება – არჩევნები COVID-19-ის პირობებში: ახალი გამოწვევა საქართველოს მყიფე დემოკრატიისთვის“, - აღნიშნულია ინფორმაციაში.
ცნობისთვის, 1 ივლისს, 16:00 საათზე კონფერენციის მეორე პანელი გაიმართება, თემაზე: "საერთაშორისო აქტორები და არჩევნები".