ესპანეთში კოვიდ 19-ის საწინააღმდეგო ვაქცინაზე მუშაობა წარმატებით მიმდინარეობს. არსებობს ალბათობა, რომ რამდენიმე თვეში ვაქცინას ადამიანებზე გამოცდიან. ამის შესახებ ქვეყნის მეცნიერების მინისტრმა პედრო დუკემ განაცხადა.
მისი თქმით, მსოფლიოში ვაქცინის შექმნის 180 პროექტი არსებობს, მათ შორის ესპანეთში - 12, რომლებიც სახელმწიფო ბიუჯეტიდან ფინანსდება.
„12-დან ხუთ ჯგუფში უკვე არის ის, რასაც უწოდებენ „კანდიდატ ვაქცინებს“ და იწყებენ წინასაკლინიკე გამოცდებს ცხოველებზე. ერთ-ერთმა პროექტმა, რომელსაც ასეთი კანდიდატი ვაქცინა აპრილის ბოლოს უკვე ჰქონდა, ცხოველებზე კვლევა უკვე დაასრულა და ამ ვაქცინაზე დიდი იმედი არსებობს“ , - განაცხადა მინისტრმა.
ესპანეთის მეცნიერების სამინისტროს ინფორმაციით, არის იმედი, რომ ადამიანებზე ვაქცინის გამოცდას დეკემბერში დაიწყებენ. საუბარია ოთხ პროექტზე.