სლოვენიის ეკონომიკის მინისტრი ზდრავკო პოჩივალშეკი კორონავირუსისგან დამცავი სამედიცინო აღჭურვილობების შესყიდვასთან დაკავშირებით გამოვლენილი დარღვევების გამო დააკავეს, - ამის შესახებ ინფორმაციას „დოიჩე ველე“ ავრცელებს.

გამოცემის ცნობით, თანამდებობა დატოვა ქვეყნის შინაგან საქმეთა მინისტრმა ალეს ჰოისმა, რომელმაც მიმდინარე გამოძიება „პოლიტიკურად მოტივირებულ მოქმედებად“ შეაფასა.

პოლონეთის მედიის ინფორმაციით, დაკავებული ზდრავკო პოჩივალშეკი მოგვიანებით გაათავისუფლეს.

ცნობისათვის, სლოვენიის მედიაში გავრცელებული ინფორმაციის თანახმად, კორონავირუსისგან დამცავი სამედიცინო აღჭურვილობებისა და რესპირატორების სახელმწიფო შესყიდვები გარკვეული დარღვევებით ხორციელდებოდა. მედიის ინფორმაციით, ეკონომიკის მინისტრი გარიგებას ისეთ კომპანიებს სთავაზობდა, რომლებიც ადეკვატური სამედიცინო აღჭურვილობების მოწოდებას არ ახორციელებდნენ. ზდრავკო პოჩივალშეკი ბრალდებებს უარყოფს.