ქუთაისში, ჩხობაძის კლინიკის მედპერსონალმა კუთვნილი ანაზღაურების მოთხოვნით აქცია გამართა. როგორც აქციის მონაწილეები აცხადებენ, 4 თვეა 300-მდე თანამშრომელს ხელფასები არ აუღია. საავადმყოფოს თანამშრომლების თქმით, მას შემდეგ, რაც კლინიკა ე.წ ცხელების ცენტრად გადაკეთდა, კორონავირუსს პერსონალი ადგილზე ებრძვის, ხოლო მათი ნაწილი სამუშაოდ წყალტუბოს საკარანტინო სივრცეში გაგზავნეს, თუმცა, დაპირებული ანაზღაურება მათთვის არავის მიუცია.
„ცხელების ცენტრში 90 თანამშრომელი ვართ, წყალტუბოში კი 16 კაცი გაგვგზავნეს. თანამშრომლების ნაწილი სახლში გაუშვეს. 4 თვეა წყალტუბოში დავდივარ, თუმცა ანაზღაურება არ მიმიღია. ვრეკავდით ცხელების ცენტრში, თუმცა რეაგირება არავის ჰქონია. ყველანაირად შეურაცხყოფილები ვართ. საარჩევნოდ ბროშურების გაკეთებას ექთნებს მოგვხედონ. ჩვენთვის არც ტაში აღმოჩნდა და არც მადლობა. ვგრძნობთ, რომ ქვეყნისთვის საჭირო არ ვართ,”-ამბობენ საავადმყოფოს თანამშრომლები.
აქციას პარტია „თავისუფალი საქართველოს” თანათავმჯდომარე გოგი წულაია შეუერთდა. მისი თქმით, ხელისუფლება არ ზრუნავს ადამიანებზე, რომლებიც პანდემიის დროს მუშაობდნენ.