სარფში, სადაც თურქეთში დასაქმებული საქართველოს მოქალაქეების აქცია იმართება, აქციის მონაწილეები აჭარის მთავრობის წარმომადგენლებთან შეხვედრას მოითხოვენ. მათ პროტესტის ნიშნად სარფი-ბათუმის დამაკავშირებელი გზა კვლავ გადაკეტეს. ადგილზე სამართალდამცავები არიან მობილიზებული და გზის გახსნას ცდილობენ, თუმცა მოქალაქეები გზის სავალი ნაწილიდან არ გადადიან და მოთხოვნების შესრულებას ითხოვენ.

აქციის მონაწილეები ამბობენ, რომ დაუყოვნებლივ უნდა გაიხსნას სარფის საბაჟო გამშვები პუნქტი და მათ მეზობელ ქვეყანაში მუშაობის შესაძლებლობა მიეცეთ, წინააღმდეგ შემთხვევაში პროტესტის გაგრძელებას გეგმავენ. ამასთან, ისინი 300 - ლარიანი კომპენსაციის მიღებას ითხოვენ.