აჭარის მთავრობის თავმჯდომარე, თორნიკე რიჟვაძე ამერიკელ ხალხს დამოუკიდებლობის დღეს ულოცავს. ამის შესახებ „ინტერპრესნიუსს“ აჭარის მთავრობიდან აცნობეს.

როგორც თორნიკე რიჟვაძე აღნიშნავს, ამერიკის შეერთებული შტატები საქართველოს უმნიშვნელოვანესი სტრატეგიული პარტნიორია და ორ ქვეყნას საერთო ღირებულებები აერთიანებს.

„დღეს საფუძველი ჩაეყარა სახელმწიფოს, რომლის მთავარი ფასეულობა - თავისუფლება, დამოუკიდებლობა, კანონის უზენაესობაა. მინდა მადლობა გადავუხადო ჩვენს ამერიკელ პარტნიორებს საქართველოს ევროპული და ევროატლანტიკური მისწრაფებების, ქვეყნის სუვერენიტეტისა და ტერიტორიული მთლიანობის მტკიცე მხარდაჭერისთვის“ - განაცხადა თორნიკე რიჟვაძემ.

მთავრობის თავმჯდომარემ პანდემიის ფონზე არსებულ გამოწვევებზეც ისაუბრა და იმედი გამოთქვა, რომ მალე დაიძლევა გლობალური გამოწვევა და სახელმწიფოებს შორის არსებული წარმატებული თანამშრომლობა უფრო გაღრმავდება.