ევროკავშირი ყირიმის ტერიტორიაზე უკრაინის მოქალაქეების დაკავებას პოლიტიკურად მოტივირებულად და უკანონოდ მიიჩნევს და რუსეთისგან დაკავებულების გათავისუფლებას მოელის, - ამის შესახებ ევროკავშირის საგარეო საქმეთა და უსაფრთხოების პოლიტიკის ოფიციალურმა წარმომადგენელმა, პიტერ სტანომ განაცხადა.
„7 ივლისს, ყირიმის ნახევარკუნძულზე 7 პირი, ძირითადად ყირიმელი თათრები, დააპატიმრეს საეჭვო პოლიტიკური კუთვნილების გამო. ევროკავშირი თვლის, რომ მათი დაკავება პოლიტიკურად მოტივირებულია და ვინაიდან დაკავება რუსეთის ხელისუფლების მიერ უკრაინის ტერიტორიაზე მოხდა, ჩვენ ამას საერთაშორისო კანონმდებლობის შესაბამისად, უკანონოდ მივიჩნევთ. ევროკავშირი არ აღიარებს რუსეთის კანონმდებლობის აღსრულებას ყირიმსა და ქალაქ სევასტოპოლში და ელოდება, რომ უკანონოდ დაკავებული ყველა უკრაინელი დაუყოვნებლივ გათავისუფლდება,“- აღნიშნულია პიტერ სტანოს მიერ გავრცელებულ განცხადებაში.
მისივე თქმით, ევროკავშირი რუსეთისგან ყირიმელ თათრებზე ზეწოლის შეწყვეტასა და ნახევარკუნძულზე ადამიანთა უფლებების საერთაშორისო სტანდარტების დაცვის გარანტიას ელოდება.
„ევროკავშირი ურყევად უჭერს მხარს უკრაინის დამოუკიდებლობას, სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში,“- აღნიშნულია განცხადებაში.
ცნობისათვის, უკრაინული მედიის ინფორმაციით, 7 ივლისს რუსეთის უსაფრთხოების ძალებმა ოკუპირებული ყირიმის ოთხ რაიონში ყირიმელი თათრების სახლებში რეიდი განახორციელეს და 7 პირი დააკავეს.