პარლამენტში სახელმწიფო უსაფრთხოების სამსახურის 2019 წლის ანგარიშის მოსმენა მიმდინარეობს. სუს-ის უფროსის მოადგილე, ალექსანდრე ხოჯევანიშვილი, დეპუტატებს ანგარიშს სამი კომიტეტის გაერთიანებულ სხდომაზე წარუდგენს.

„ჩვენი ქვეყნის უსაფრთხოება განსაზღვრავს ჩვენი სახელმწიფოს განვითარების პერსპექტივებს. ამიტომ ცხადია, მაღალი ინტერესია სუს-ის ანგარიშის მიმართ. წლევანდელი ანგარიში შინაარსობრივად ძალზედ დატვირთულია. საუბარია ოკუპირებულ ტერიტორიებზე შექმნილ ვითარებაზე, საუბარია კონტრსადაზვერვო და ანტიტერორისტულ საქმიანობაზე, ასევე კორუფციის წინააღმდეგ ბრძოლაზე. ცხადია, დეპუტატებს ექნებათ კითხვები. მესმის, რომ წინასაარჩევნო პერიოდში ვიმყოფებით, მაგრამ სწორად არ მიმაჩნია, როდესაც თავდაცვის და უსაფრთხოების საკითხების მიზანმიმართული პოლიტიზირება ხდება. სუს-ი აპოლიტიკური ორგანიზაციაა, ამიტომ იქ, სადაც საერთო ეროვნული ინტერესია, სასურველია, რომ მაქსიმალურად შევეცადოთ და არ მოვახდინოთ ამ უწყების პოლიტიზირება,"- განაცხადა ირაკლი სესიაშვილმა კომიტეტის სხდომის დაწყებამდე.