ბათუმში ბაგრატიონის ქუჩის #28-ში კორპუსის მშენებლობის წინააღმდეგ ადგილობრივებმა აქცია გამართეს.

აქციის მონაწილეების თქმით, მშენებლობის ყველა სტანდარტი დარღვეულია, რადგან ახალი კორპუსი კომპანიამ მათ საცხოვრებელ კორპუსს მიაშენა.

აქციის მონაწილეების განცხადებით, საჭიროების შემთხვევაში, სახანძრო მანქანა ადგილზე ვერ მივა.

აქციის მონაწილეები კორპუსის დემონტაჟს ითხოვენ.

"შეუძლებელია აქ ცხოვრება, როგორც ხედავთ ფანჯრები ერთმანეთის პირისპირაა, მზე აღარ ჩანს, აღარც ქარი შემოდის. უკვე მოხდა არა ერთი ქურდობის ფაქტი, რადგან ადვილია გადასვლა. ხანძარი რომ გაჩნდეს, ვერ შემოვა სახანძრო მანქანა. დარღვეულია ყველა სტანდარტი. ჩვენ ვიცოდით, რომ აქ სკვერი უნდა აშენებულიყო. მშენებლობა მეორე წელია მიმდინარეობს, ვის არ მივმართეთ, მაგრამ უშედეგოდ. ვითხოვთ, კორპუსის დემონტაჟს", - განაცხადა მადონა სამხარაძემ

აქციას, შპს "ბაგრატიონი 26" -ის დირექტორი ირაკლი აბაშიძე გამოეხმაურა.

"ჩემი პროექტი უფრო ადრე დამტკიცდა, მაგრამ, როცა დავიწყე მშენებლობა მეორე მშენებელმა დამასწრო. მან ადგილობრივები მოატყუა, აქ სკვერი იქნებაო. ფუნდამენტის ჩასმის შემდეგ პროექტი, რაც შემეძლო, შევცვალე. დემონტაჟი გამორიცხულია. არც მშენებლობაა უკანონო. მეც ვზარალდები, ფაქტიურად ერთ მხარეს ვერ გავყიდი" , - განაცხადა ირაკლი აბაშიძემ.