კორონავირუსის პანდემიის გამო, წელს ვაჟა ფშაველას 159-ე დაბადების დღე ვერ აღინიშნა, თუმცა სოფელ ჩარგალში არსებულ სახლ-მუზეუმს დამთვალიერებლები მაინც სტუმრობდნენ. ამის შესახებ „ინტერპრესნიუსს“ მცხეთა-მთიანეთის მხარის სახელმწიფო რწმუნებულის პრესსამსახურიდან აცნობეს.
მათი ინფორმაციით, მუზეუმი ვიზიტორებისთვის ღიაა და ნებისმიერ მსურველს შესაძლებლობა აქვს ეწვიოს იმ სახლს, სადაც მწერალი დაიბადა.
„სოფელ ჩარგალში დღეს მცხეთა-მთიანეთის მხარეში სახელმწიფო რწმუნებული შალვა კერესელიძე, ასევე მწერლები ტარიელ ხარხელაური და მანანა ჩიტიშვილი იმყოფებოდნენ. გუბერნატორმა ლუკა რაზიკაშვილის სახლ-მუზეუმის თანამშრომლებს, მწერლებს და იქ მყოფ საზოგადოებას მწერლის იუბილე პირადად მიულოცა. ვაჟა-ფშაველა 1915 წლის 17 ივლისს გარდაიცვალა. იგი ჯერ დიდუბის პანთეონში დაკრძალეს, გარდაცვალებიდან 20 წლისთავზე კი მთაწმინდაზე გადაასვენეს“, - აღნიშნულია ინფორმაციაში.
ლუკა რაზიკაშვილი 1861 წლის 14 ივლისს, ფშავში სოფელ ჩარგალში დაიბადა, სადაც იგი 8 წლამდე იზრდებოდა.