პოლიციამ იერუსალიმში, პრემიერ-მინისტრ ბენიამინ ნეთანიაჰუს გადადგომის მოთხოვნით გამართული აქციის დასაშლელად წყლის ჭავლი გამოიყენა, - ამის შესახებ ინფორმაციას Times of Israel-ი ავრცელებს.

გამოცემის ცნობით, აქციის მონაწილეები დამცავ ბარიერებს არღვევდნენ და სამართალდამცავებს თავს ესხმოდნენ, მათმა ნაწილმა გზები გადაკეტა და ქალაქის ცენტრში ნაგვის ურნებს ცეცხლი წაუკიდა.

გავრცელებული ინფორმაციით, აქციის დაშლისას პოლიციამ 50 აქტივისტი დააკავა, არეულობისას ერთი სამართალდამცველი დაშავდა.

საპროტესტო აქციის ასობით მონაწილე ხელისუფლებას კორონავირუსის ეპიდემიის გამო გამოწვეულ ეკონომიკურ შედეგებთან არასათანადო გამკლავების გამო აკრიტიკებდა. გარდა ამისა, ისინი ნეთანიაჰუს გადადგომას მის წინააღმდეგ მიმდინარე სისხლის სამართლის საქმეების გამოც მოითხოვდნენ.