„ჯორჯიან მანგანეზმა“ სოფელ დარკვეთის ტერიტორიაზე ტექნიკური რეკულტივაციის სამუშაოები დაიწყო

„ჯორჯიან მანგანეზმა“ სოფელ დარკვეთის ტერიტორიაზე ტექნიკური რეკულტივაციის სამუშაოები დაიწყო.

"კაციტაძეები 1"-ის კარიერის მთლიანი ფართობი, რომელიც ამ ეტაპზე ტექნიკურ რეკულტივაციას ექვემდებარება, 8,4 ჰექტარს შეადგენს. აღნიშნულ ტერიტორიაზე სარეკულტივაციო სამუშაოები აქტიურ რეჟიმში მიმდინარეობს და მისი დასრულება, დაახლოებით, 10 დღის ვადაში იგეგმება, - ამის შესახებ „ინტერპრესნიუსს“ კომპანია „ჯორჯიან მანგანეზიდან“ აცნობეს.

„ჯორჯიან მანგანეზის“ სპეციალური მმართველის ნიკოლოზ ჩიქოვანის განცხადებით, „ჯორჯიან მანგანეზისთვის“ ეკოლოგიური პირობების გაუმჯობესება ჭიათურის რეგიონში და მთლიანად „ჯიემში“ ერთ-ერთი მთავარი საქმე და მიზანია.

„კომპანიამ ბოლო 2 წლის განმავლობაში, დაახლოებით, 130 ჰექტარზე მეტი ტერიტორიის ტექნიკური რეკულტივაცია მოახდინა, მათ შორის, გარკვეული ნაწილის ბიოლოგიური რეკულტივაცია. აღნიშნული პროცესი უწყვეტად გაგრძელდება, სანამ ძველი პირობები და დაზიანებული ნიადაგი არ გაუმჯობესდება. ასევე, რა თქმა უნდა, თანმდევი პროცესია ახალგადახსნილი ნიადაგების აღდგენა და პირვანდელ სახემდე მიყვანა. წლების განმავლობაში ტერიტორიებზე რეკულტივაცია არ ხდებოდა, სამუშაოები ქაოტურად მიმდინარეობდა, ბოლო სამ წელიწადში კი სარეკულტივაციო სამუშაოები ძალიან დიდ ტერიტორიაზე განხორციელდა“, - განაცხადა ნიკოლოზ ჩიქოვანმა.

„ჯორჯიან მანგანეზის“ გარემოს დაცვის დირექტორის ირაკლი ნოზაძის განცხადებით, ტექნიკური რეკულტივაციის დასრულების შემდეგ, აღნიშნული მიწის ბიოლოგიური რეკულტივაციისთვის მომზადება დაიწყება, ტერიტორია შემოიღობება და მიმდინარე წლის შემოდგომაზე ის გამწვანდება.

„გასულ წელს ტექნიკური რეკულტივაციის სამუშაოები საერთო მასშტაბით 50 ჰექტარზე მეტ ტერიტორიაზე განხორციელდა, მათ შორის, რგანში 27-ე კარიერი, ე.წ. საბუეს კარიერის ტერიტორია, თურმანაულის კარიერი და ა.შ. წელს უკვე ორი პროცესი იქნება პარალელურად - ერთი არის ასევე 50 ჰექტარი დამატებით ტერიტორიის ტექნიკური რეკულტივაცია, ხოლო შემოდგომაზე წინა წელს ტექნიკურად რეკულტივირეულ ფართებზე გამწვანება და ბიოლოგიური რეკულტივაციის სამუშაოების ჩატარება“, - აცხადებს ირაკლი ნოზაძე.

„ჯორჯიან მანგანეზისთვის“ გარემოსდაცვითი პოლიტიკა პრიორიტეტული მიმართულებაა, რომელსაც, სახელმწიფოს წინაშე აღებული გარემოსდაცვითი ვალდებულების ფარგლებში, გეგმურად ასრულებს.

თორნიკე ჯანაშვილი - ქვეყანა ღრმა ეკონომიკურ კრიზისშია  და მომავალ წელს უფრო მძიმე  კრიზისის  წინაშე  შეიძლება აღმოვჩნდეთ
ვიქტორ ყიფიანი - როგორიც არ უნდა იყოს რეგიონალური თუ საერთაშორისო კონიუქტურა, რისკების ასაცილებლად და შესაძლებლობების გამოსაყენებლად გზები დამოუკიდებლად უნდა ვეძებოთ
ქართული პრესის მიმოხილვა 10.08.2020
სევრის ხელშეკრულების 100 წლისთავი
„მოედანი“ - პროექტი, რომელიც ავლაბარს ახალ სიცოცხლეს შესძენს
ამერიკული სტეიკის მასტერკლასი ბათუმში