აქციის მონაწილეების განცხადებით, ბათუმში, სავარაუდოდ წყლით მოწამვლის შედეგად ორი ადამიანი ინფექციურ საავადმყოფოში გადაიყვანეს. დღეს შარაშიძის ქუჩის მცხოვრებლებმა საპროტესტო აქცია გამართეს. როგორც მათ განაცხადეს, ბოლო 5 დღის განმავლობაში სასმელი წყალი უვარგისია და სავარაუდოდ, რამდენიმე პირი მოიწამლა.

აქციის მონაწილეების ინფორმაციით, რამდენიმე მოქალაქეს სასწრაფო სამედიცინო ბრიგადამ პირველადი დახმარება ადგილზე გაუწია. აქციის მონაწილეები ირწმუნებიან, რომ მოწამლულთა შორის ერთი მცირეწლოვანია.

მოქალაქეებმა პროტესტის ნიშნად ქუჩა გადაკეტეს. მათ პრობლემის გასაცნობად, ადგილზე აჭარის ჯანდაცვის მინისტრის მოადგილე ნინო ნიჟარაძე მივიდა. ამასთან, სურსათის უვნებლობის სამსახურის თანამშრომლებმა წყლის სინჯი აიღეს. თავის მხრივ, შპს "ბათუმის წყალში" კი აცხადებენ, რომ ფაქტზე პასუხისმგებლობას უწყება ვერ აიღებს, რადგან აღნიშნულ დასახლებაში შპს "ბათუმის წყალს" ქსელი არა აქვს.

"ბათუმის წყალს“ აღნიშნულ დასახლებაში ქსელი არა აქვს და არც აბონენტები არ ჰყავს, შესაბამისად, აღნიშნულ ფაქტზე „ბათუმის წყალი“ პასუხისმგებლობას ვერ აიღებს",- აცხადებენ „ბათუმის წყალში“.