ლადო მესხიშვილის სახელობის სახელმწიფო პროფესიულმა თეატრმა 159-ე სეზონი "ბრემენელი მუსიკოსებით" დახურა. როგორც "ინტერპრესნიუსს" იმერეთში სახელმწიფო რწმუნებულის ადმინისტრაციიდან აცნობეს, რეკომენდაციების გათვალისწინებით სპექტაკლი თეატრის კიბეებზე გაიმართა. "ბრემენელმა მუსიკოსებმა" ანშლაგით ჩაირა.
უწყების ცნობით, სპექტაკლს საზოგადოების წარმომადგენლებთან ერთად იმერეთში სახელმწიფო რწმუნებული ზვიად შალამბერიძე, ქუთაისის მერის მოვალეობის შემსრულებელი დავით ერემეიშვილი და ქუთაისის საკრებულოს თავმჯდომარის მოვალეობის შემსრულებელი ირაკლი შენგელია დაესწრნენ.
" "ბრემენელი მუსიკოსები" გასულ წელს რეჟისორმა კახაბერ გოგოლაშვილმა დადგა. მთარგმნელი და სიმღერების ტექსტის ავტორია გვანცა ჯავახაძე, მუსიკალური ხელმძღვანელი და არანჟირების ავტორია ერეკლე დიდია, სასცენო მოძრაობა ბაქარ ბაქრაძეს ეკუთვნის, რეჟისორის თანაშემწე კი მაია კვიმსაძეა",- ნათქვამია ინფორმაციაში.
თეატრის სამხატვრო ხელმძღვანელის განცხადებით, 27 სექტემბერს თეატრი 160-ე სეზონს პრემიერით გახსნის, ასევე გაიხსნება მესამე თეატრული სივრცე - "მწვანე თეატრი", რომელიც მესხიშვილის თეატრის ეზოში იქნება განთავსებული.