თვითმხილველების ინფორმაციით, რუსთავის საქალაქო სასამართლოს მიმდებარე ტერიტორიიდან სამართალდამცავებს ბრალდებული გაექცათ. პოლიციამ ის სასამართლოს შენობიდან რამდენიმე მეტრში, ერთ-ერთი კორპუსის ეზოში, მალევე დააკავა. შემთხვევა ორი დღის წინ მოხდა. მომხდარს რუსთავის საქალაქო სასამართლოში ადასტურებენ.

როგორც „ინტერპრესნიუსს“ სასამართლოში განუცხადეს, შემთხვევა პროცესის დასრულების შემდეგ, შენობის გარე ტერიტორიაზე, საავტომობილო გზის სავალ ნაწილზე მოხდა. რუსთავის სასამართლომ საქონლის ქურდობის ფაქტზე დაკავებული პირებისთვის აღმკვეთი ღონისძიების შეფარდების საკითხი განიხილა, პროცესის დასრულების შემდეგ კი ერთ-ერთი ბრალდებული ახალგაზრდა მამაკაცი პოლიციის მანქანიდან გადახტა და გაქცევა სცადა.