ამომრჩეველს ვპირდებით, რომ ჩვენი საქმიანობა იქნება ინტენსიური იმისათვის, რათა თავი დავაღწიოთ ორ უბედურებას - ოკუპაციას და ვირუსის შემოტევას, - ამის შესახებ „ქართული ოცნება -დემოკრატიული საქართველოს“ დიდუბე-ჩუღურეთის მაჟორიტარი დეპუტატობის კანდიდატმა გიორგი ვოლსკიმ ჟურნალისტებს წარდგენის შემდეგ განუცხადა.
როგორც ვოლსკიმ აღნიშნა, „ქართული ოცნება“ ამომრჩეველს ჰპირდება, რომ განვითარებას საფუძვლად სტაბილურობა ექნება.
„ვფიქრობ, გავიმარჯვებთ იმდენად, რამდენადაც საზოგადოების განწყობა ზოგადად, არა მარტო ჩვენ რაიონში, არის პოზიტიური, მიუხედავად იმისა, რომ სირთულეებია. სირთულეებთან გასამკლავებლად საზოგადოება სწორედ „ქართულ ოცნებას“ ირჩევს, როგორც სტაბილურობის გარანტს, როგორც უფრო რეალურ რესურსს. საქართველოში ამომრჩეველს ვპირდებით იმას, რომ განვითარებას საფუძვლად ექნება სტაბილურობა, რასაც ამ 8 წელიწადში საგანგებო ყურადღება ექცეოდა. ვპირდებით იმას, რომ ძალიან მძლავრ პოზიციებს დავიკავებთ საერთაშორისო ასპარეზზე. ვპირდებით იმას, რომ ჩვენი საქმიანობა იქნება ინტენსიური იმისათვის, რათა თავი დავაღწიოთ ორ უბედურებას - ოკუპაციას და ვირუსის შემოტევას“, - განაცხადა ვოლსკიმ.