ისრაელში ექთნების საყოველთაო გაფიცვა დაიწყო, - ამის შესახებ ინფორმაციას BBC-ი ავრცელებს. გამოცემის ცნობით, ექთნები კადრების დეფიციტსა და კორონავირუსის გამო გაუარესებულ სამუშაო პირობებს აპროტესტებენ.

„სხვა არჩევენი არ გვაქვს, იძულებულები ვართ, საკითხს თავად მივხედოთ და ჯანდაცვის სისტემა ზამთარში მოსალოდნელი კოლაფსისგან დავიცვათ“, - განაცხადა ექთნების კავშირის ხელმძღვანელმა ილანა კოენმა.

BBC-ი წერს, რომ ისრაელის ჯანდაცვის სამინისტროს მონაცემებით, ამ დროისთვის 800-ზე მეტი მედდა კარანტინში იმყოფება, საავადმყოფოებში კი მათი შემცვლელები არ ჰყავთ.

შესაბამისად, სამედიცინო დაწესებულებებს შემცირებული კადრებით უწევთ მუშაობა. შეგახსენებთ, ბოლო კვირების განმავლობაში ისრაელში კორონავირუსის შემთხვევების ზრდა ფიქსირდება. არსებული მონაცემებით, პანდემიის გავრცელების დროიდან ქვეყანაში „კოვიდ 19“-ის 50 714 შემთხვევაა დადასტურებული, დაღუპულია 415 ადამიანი.