წყალმომარაგების კომპანიამ, საქართველოს რეგიონებში მოსახლეობის სტაბილური წყალმომარაგებისა და ახალი ინფრასტრუქტურის მოწყობის პროექტის ფარგლებში, ხობის მუნიციპალიტეტის, სოფელ ძველი ხიბულას წყალმომარაგების სისტემის რეაბილიტაციის პროექტზე ტენდერი გამოაცხადა. ამის შესახებ „ინტერპრესნიუსს“ წყალმომარაგების კომპანიიდან აცნობეს.
მათივე ცნობით, წინადადებების მიღება მიმდინარე წლის 11 აგვისტომდე გაგრძელდება. გამარჯვებულმა კომპანიამ სამუშაოები 18 თვეში უნდა დაასრულოს.
„დღეის მდგომარეობით, სოფელ ძველ ხიბულაში წყალმომარაგების ცენტრალიზებული სისტემა არ არსებობს, მოსახლეობა ინდივიდუალურად მოწყობილი ჭებიდან მარაგდება. სამუშაოების ფარგლებში, მოეწყობა ახალი სათავე ნაგებობა, რეზერვუარები და გამანაწილებელი ქსელი.
პროექტის განხორციელება საბოლოოდ აღმოფხვრის სოფლის წყალმომარაგების პრობლემას და ადგილობრივებს სასმელი წყლის 24-საათიანი მიწოდებით უზრუნველყოფს. სამუშაოებისთვის სახელმწიფო ბიუჯეტიდან 10 მილიონ ლარამდეა გამოყოფილი“, - აღნიშნულია ინფორმაციაში.