საგარეო ურთიერთობათა კომიტეტის თავმჯდომარის ირაკლი ბერაიას განცხადებით, საოკუაციო ძალების მიერ უკანონოდ დაკავებული საქართველოს მოქალაქეების ზაზა გახელაძის და ხვიჩა მღებრიშვილის გათავისუფლების მიზნით ცენტრალური ხელისუფლების შესაბამისი სტრუქტურები აქტიურად მუშაობენ. მისივე თქმით, ამოქმედებულია ყველა ინსტრუმენტი, მათ შორის, ინფორმირებულები არიან საქართველოს საერთაშორისო პარტნიორები, ჟენევის საერთაშორისო დისკუსიების თანათავმჯდომარეები.

"არაერთხელ გააქტიურდა ცხელი ხაზი ამ საკითხთან დაკავშირებით. რა თქმა უნდა, იდგმება ნაბიჯები. ეს ადამიანები არიან ოკუპაციისგან გამოწვეული მძიმე შედეგების მსხვერპლი. ასევე 30 ივლისს დაგეგმილია ინციდენტების პრევენციისა და მათზე რეაგირების მექანიზმების 69-ე შეხვედრის გამართვა. ამ შეხვედრაზე ჩვენი მხრიდან დასმული იქნება ყველა ის საკითხი, რომელიც ბოლო შეხვედრიდან აქტუალური და პრობლემური იყო საოკუპაციო ხაზის ორივე მხარეს. ეს ეხება ჩვენი მოქლაქეების უკანონო დაკავებებს, უკანონო ბორდერიზაციის პროცესებს და სხვა იმ საკითხებს, რაც ოკუპაციით გამოწვეულ პრობლემებს წარმოადგენს", - განაცხადა ბერაიამ.