მთავრობის განკარგულებით, საავტომობილო გზების დეპარტამენტი, ადგილობრივი მნიშვნელობის პიპილეთი-ცხმორი-ფსორი-ბაჯიხევის საავტომობილო გზის რეაბილიტაციას ახორციელებს. როგორც „ინტერპრესნიუსს“ საავტომობილო გზების დეპარტამენტიდან აცნობეს, სარეაბილიტაციო გზა, ონის მუნიციპალიტეტში მდებარეობს.
მათი ინფორმაციით, არსებული გზა ძლიერ დაზიანებული და გრუნტის საფარით იყო წარმოდგენილი.
„ავტოტრანსპორტის უსაფრთხო და კომფორტული გადაადგილებისთვის გზა სასწრაფოდ საჭიროებდა კაპიტალურ შეკეთებას. პრობლემის მოსაგვარებლად, პროექტის შესაბამისად, გათვალისწინებულია 11.5 კმ-იან მონაკვეთზე ბეტონის საფარის, სანიაღვრე სისტემისა და წყალგამტარი მილების მოწყობა, ასევე ხელოვნური ნაგებობების რეაბილიტაცია. პროექტი, სახელმწიფო ბიუჯეტიდან ფინანსდება და მისი ღირებულება 7 474 785 ლარია. სამუშაოების დასრულება მიმდინარე წლის ბოლოს იგეგმება“,- აღნიშნულია ინფორმაციაში.