იაპონიის ელჩი - საქართველოს გადავცემთ მაღალტექნოლოგიურ სამედიცინო აპარატურას, რომლის ღირებულება დაახლოებით, 2.8 მილიონი დოლარია

„დღეს, ვხედავთ შთამბეჭდავი და შესანიშნავი წარმატების ისტორიას, თუ როგორ ებრძვის საქართველო პანდემიას“, - ამის შესახებ იაპონიის საგანგებო და სრულუფლებიანმა ელჩმა საქართველოში ტადაჰარუ უეჰარამ საქართველოსა და იაპონიის მთავრობებს შორის, დაახლოებით, 2.8 მილიონი აშშ დოლარის ოდენობის არასაპროექტო გრანტის თაობაზე შეთანხმების ხელმოწერის შემდეგ განაცხადა.

მან განსაკუთრებით გაუსვა ხაზი იმ შედეგებს, რომელსაც საქართველომ მიაღწია COVID-19-ის წინააღმდეგ ბრძოლის მიმართულებით და იმედი გამოთქვა, რომ იაპონიის მთავრობის მიერ გამოყოფილი ფინანსური რესურსებით შეძენილი მაღალტექნოლოგიური სამედიცინო აპარატურა გააძლიერებს ქვეყნის ჯანდაცვის სექტორს.

„დღეს, ხელი მოვაწერეთ ნოტებს, რათა საქართველოს გადავცეთ მაღალტექნოლოგიური სამედიცინო აპარატურა, რომლის ღირებულებაა 300 მილიონი იაპონური იენი, დაახლოებით, 2.8 მილიონი აშშ დოლარი. რთული გეოპოლიტიკური და ეკონომიკური პირობების მიუხედავად, დღეს, ვხედავთ შთამბეჭდავი და შესანიშნავი წარმატების ისტორიას, თუ როგორ ებრძვის საქართველო პანდემიას. ასე რომ, მოხარული ვარ, მივულოცო საქართველოს მთავრობასა და ხალხს პანდემიის პერიოდში გამოჩენილი სოლიდარობა. დარწმუნებული ვარ, რომ თქვენი წარმატების ისტორია დაეხმარება საქართველოს, მნიშვნელოვანი როლი ითამაშოს დაავადების წინააღმდეგ ბრძოლის გლობალურ ძალისხმევაში. იაპონიის მხარდაჭერა არ არის ერთჯერადი ხასიათის. ჩვენი მიზანია, ხელი შევუწყოთ საქართველოს გრძელვადიან ეკონომიკურ სტაბილურობასა და მედეგობას. ადამიანის უსაფრთხოების პროგრამის ფარგლებში, იაპონიის მთავრობამ ბოლო 20 წლის განმავლობაში 180-ზე მეტი პროექტი დააფინანსა. იაპონია კვლავაც განაგრძობს საქართველოს მხარდაჭერას, მისი მოქალაქეების კეთილდღეობისთვის, რათა არც ერთი ადამიანი არ დარჩეს საბაზისო საჭიროებების მიღმა, ხოლო საქართველომ მიაღწიოს მდგრად განვითარებას. გარდა ამისა, ვიმედოვნებთ, რომ ჩვენი მხარდაჭერა, ხელს შეუწყობს საქართველოს მოსახლეობის კეთილდღეობას. იაპონელი ხალხის სახელით, გთხოვთ მიიღოთ ეს სამედიცინო ტექნიკა იაპონელი ხალხისგან ქართველი ხალხის მიმართ მეგობრობის ნიშნად“, - აღნიშნა იაპონიის საგანგებო და სრულუფლებიანმა ელჩმა საქართველოში ტადაჰარუ უეჰარამ.

ინფორმაციას საქართველოს ფინანსთა სამინისტრო ავრცელებს.

კახა გოგოლაშვილი - ევროკავშირის მედიაცია გახდა ინსტრუმენტი, რომელიც არ არის ერთჯერადი, სანამ კრიზისი არ მოგვარდება, ევროკავშირი ამ პროცესში ჩართული იქნება
ქართული პრესის მიმოხილვა 03.03.2021
ქართული კონსტიტუციის 100 წლისთავთან დაკავშირებით კავკასიის საერთაშორისო უნივერსიტეტი სამეცნიერო კრებულს ამზადებს
იურიდიული პირები პროკრედიტ ბანკში ანგარიშებს დისტანციურად გახსნიან
ევროპის გუნდი: ლიბერთი ბანკისთვის უზრუნველყოფილი დამატებითი დახმარებით, COVID-19-ის კრიზისის დასაძლევად  ევროპის საინვესტიციო ბანკის მიერ მიკრო, მცირე და საშუალო საწარმოების მხარდაჭერა ახალ ეტაპზე გადადის
"მაგნიტის" ყოველდღიური 20%-იანი აქცია უფრო მრავალფეროვანი ხდება
სამომხმარებლო სესხი 3-თვიანი სრული საშეღავათო პერიოდით - ტერაბანკის ახალი აქცია