ბათუმის მერის მოვალეობის შემსრულებელმა არჩილ ჩიქოვანმა ინფრასტრუქტურული პროექტები დაათვალიერა.
ლეონიძისა და გაგარინის ქუჩების დამაკავშირებელ მონაკვეთსა და გაგარინის ქუჩაზე კეთილმოწყობის სამუშაოები მიმდინარეობს. ამის შესახებ „ინტერპრესნიუსს“ ბათუმის მერიიდან აცნობეს.
მათივე ინფორმაციით, აღნიშნულ მონაკვეთზე უკვე დასრულდა სანიაღვრე ჭებისა და მილების მონტაჟი, ასევე ტროტუარის ფილებისა და ბორდიურების მოწყობა.
გაგარინის ქუჩაზე დასასრულს უახლოვდება სანიაღვრე არხის მოწყობის სამუშაოები, რის შემდეგაც დაგეგმილია ასფალტის საფარის დაგება.
სამუშაოები მიმდინარე წლის აპრილში დაიწყო და წლის ბოლომდე დასრულდება. პროექტის ღირებულება 1 მილიონ 623 ათას ლარს შეადგენს.