საქართველოში კორონავირუსის 10 ახალი დადასტურებული შემთხვევიდან 5 გარდაბნის მუნიციპალიტეტში, გაჩიანის დასახლების სოფელ ყარაჯალარში დაფიქსირდა.

როგორც „ინტერპრესნიუსთან“ საუბარში გარდაბნის მუნიციპალიტეტის მერმა რამაზ ბუდაღაშვილმა განაცხადა, 225 ბიოლოგიური მასალის ლაბორატორიული კვლევის შედეგად, „კოვიდ 19“ სოფელ ყარაჯალარში მცხოვრებ 5 პირს დაუდასტურდა.

,,ეპიდემიოლოგები აგრძელებენ სოფელ ყარაჯალარში მოსახლეობის პისიარ ტესტირებას. გუშინ ლუგარის ლაბორატორიაში გადაიგზავნა 180-მდე ბიოლოგიური მასალა პისიარ ტესტირებისთვის. დღეის მდგომარეობით გარდაბნის მუნიციპალიტეტში კოვიდინფიცირების 56 დადასტურებული შემთხვევაა, აქედან 36 სოფელ ყარაჯალარშია“, - განაცხადა რამაზ ბუდაღაშვილმა.

გარდაბნის მუნიციპალიტეტის სოფელ ყარაჯალარში 24 ივლისიდან საკარანტინე რეჟიმი მოქმედებს. სოფელში მოსახლეობის გადაადგილებას სამართალდამცავები აკონტროლებენ.