რუსთავში, კორონავირუსით ინფიცირებული 87 წლის ქალის კონტაქტები დადგენილია. ამის შესახებ "ინტერპრესნიუსს" რუსთავის საზოგადოებრივი ჯანმრთელობის დაცვისა და უსაფრთხო გარემოს უზრუნველყოფის ცენტრში განუცხადეს.

"ინფიცირებული ქალის კონტაქტები დადგენილია. სულ 8 კონტაქტია, მათ "პისიარ" ტესტირებასთან ერთად ჩაუტარდებათ სიღრმისეული კვლევა. ჩვენი ეპიდემიოლოგები მუშაობენ ინფიცირების წყაროს დასადგენად", - განაცხადა "ინტერპრესნიუსთან" საუბარში რუსთავის საზოგადოებრივი ჯანმრთელობის დაცვისა და უსაფრთხო გარემოს უზრუნველყოფის ცენტრის ხელმძღვანელმა დავით ბეგიაშვილმა.

რუსთავის "ცხელების ცენტრში" "კოვიდ 19" დღეს 87 წლის ქალს დაუდასტურდა. სამედიცინო დაწესებულებაში, ის სასწრაფო-სამედიცინო დახმარების ბრიგადამ გუშინ შეიყვანა. ასაკოვან ქალს ტემპერატურა აღენიშნებოდა, ამ დრომდე მისი ინფიცირების წყარო უცნობია.