NASA-მ მარსზე ახალი თაობის თვითმავალი აპარატი გაუშვა. აპარატი სახელად „Perseverance“ ფლორიდის შტატში კანავერალის კონცხზე მდებარე კოსმოსური კვლევის ცენტრიდან რაკეტა Atlas 5-ის საშუალებით გაუშვეს.

„როიტერის“ ინფორმაციით, მისიის ღირებულება 2.4 მილიარდი აშშ დოლარია და თვითმავალი აპარატი მარსზე წარსულში პოტენციური სიცოცხლის კვალს შეისწავლის.

ახალი თაობის აპარატი „Perseverance“ ავტომობილის ზომის 6 ბორბალზე მავალი სამეცნიერო რობოტია. როგორც დაგეგმილია, ის ასევე მარსზე მინი ვერტმფრენს განათავსებს, რომელიც წითელ პლანეტაზე, პირველად, სატესტო ფრენებს განახორციელებს.

მოსალოდნელია, რომ აპარატი მარსს მომავალი წლის თებერვალში მიაღწევს. ეს NASA-ს ავტორობით, მარსის ზედაპირზე მეცხრე მოგზაურობაა.