„ლელომ“ სამტრედიაში რაიონული ორგანიზაცია გახსნა

პოლიტიკურმა გაერთიანებამ „ლელო საქართველოსთვის“ სამტრედიაში 32-ე რაიონული ორგანიზაცია გახსნა. რაიონულ ორგანიზაციას მიტროფანე სტურუა უხელმძღვანელებს. როგორ „ინტერპრესნიუსს“ „ლელოდან“ აცნობეს, შეხვედრაზე „ლელოს“ 1000-ზე მეტი მხარდამჭერი და გულშემატკივარი შეიკრიბა.

როგორც „ლელოში“ აცხადებენ, პოლიტიკური გაერთიანების ლიდერებს სამტრედიაში ადგილობრივი მოსახლეობა შეხვდა. მათ რაიონის პრობლემებზე ისაუბრეს და მათი გადაჭრის გეგმები განიხილეს. ორგანიზაციის გახსნას „ლელოს“ ლიდერი მამუკა ხაზარაძეც ესწრებოდა.

„სამტრედიამ შექმნა რკინიგზის ერთ-ერთი ყველაზე დიდი გამანაწილებელი კვანძი, რამაც საფუძველი ჩაუყარა ქვეყნის ეკონომიკას რეგიონში. დღეს ამ რკინიგზამ, რომელიც სახელმწიფოს ხელშია, თითოეულ ჩვენგანს მლრდ. ლარამდე ზარალი მიაყენა. „ქართულმა ოცნებამ“ რკინიგზა ზარალიანი გახადა, მაშინ, როდესაც ყველაზე კარგი მდებარეობა გვაქვს ევროპასა და აზიაში. მან ჩაკლა ისეთი დიდი პროექტი, როგორიც ანაკლიაა. მე პირობას გაძლევთ, როდესაც „ოცნებას“ გავისტუმრებთ, ეს პროექტი ამუშავდება, ხალხს დაასაქმებს და ის ქვეყანას ფუნქციას დაუბრუნებს“, - აცხადებს მამუკა ხაზარაძე.„ლელოს“ ლიდერმა სახელმწიფოს უსაფრთხოების სამსახურის არაეფექტიან მუშაობას გაუსვა ხაზი და აღნიშნა, რომ სუს-ის წარმომადგენლები მიტინგებზე მოსახლეობას ავიწროებენ და საკუთარი არჩევანის საჯაროდ დაფიქსირების უფლებას ართმევენ.

„ჩვენ მოსახლეობას უნდა დავიბრუნოთ იმედი და გადავდგათ ნაბიჯი თავისუფლებისკენ. არ დარჩენილა არც ერთი მიტინგი, სადაც ხელისუფლების მიერ გამოგზავნილი სუს-ის თანამშრომლები არ არიან, თავიანთი არჩევანის გამო აშინებენ ხალხს სოციალური დახმარების მოხსნით, აშინებენ ხალხს, რომ გაათავისუფლებენ სამსახურებიდან, თუკი ისინი ან მათი ახლობლები დასაქმებული არიან სახელმწიფო უწყებებში. თუმცა, ჩვენ გვაქვს ჩვენი გეგმა და ვიცით, რომ მას სისრულეში მივიყვანთ. „ლელოს“ გეგმაა, ღარიბი ეკონომიკა, რომელიც დღეს გვაქვს, უახლოეს ოთხ წელში ავამუშაოთ და გავხადოთ 100 მილიარდიანი. ჩვენ შევქმნით 200 000 სამუშაო ადგილს და ეს მხოლოდ საარჩევნო დაპირება არ არის, რადგან ჩვენ ვართ გუნდი, რომელმაც ვიცით კონკრეტული საქმის კეთება. ნულიდან გვაქვს დაწყებული საქმეები ახალ თაობასთან ერთად და დღეს ნულიდან იწყება ქართული პოლიტიკაც. ჩვენ გვჭირდება ხალხის მმართველობა, რეალური თვითმმართველობა და არა ისეთი უკვე არჩეული მერები, გაუგებარი მიზეზების გამო რომ ტოვებენ თანამდებობას“, -აღნიშნა მამუკა ხაზარაძემ.

ხაზარაძის თქმით, „ლელოს“ მთავარი ამოცანაა, განათლება მიიღოს ყველა ბავშვმა თანაბრად, ყველა რეგიონს და სოფელს ჰქონდეს ინტერნეტი, რათა შეძლონ, ადაპტირდნენ გარემოსთან. „ჩვენი მთავარი ამოცანაა, საქართველო გახდეს ფინანსური სამშვიდობო და სატრანსპორტო ამოცანა. ჩვენი პირველი გამარჯვება კი ის იქნება, როდესაც დავინახავთ, რომ გამართულ ქვეყანაში ემიგრანტები ბრუნდებიან. ჩვენ დავიწყებთ ნამდვილი სახელმწიფოს მშენებლობას, რომელიც ორიენტირებული იქნება ხალხზე,“- აღნიშნა მაამუკა ხაზარაძემ.

სამტრედიის ოფისის გახსნის ღონისძიებაზე ოფისის ხელმძღვანელმა ადგილობრივებს მიმართა და რაიონის განვითარებაში „ლელოს“ როლზე ესაუბრა.„ხელისუფლების ცვლილების დროა, რადგან ივანიშვილის მთავრობამ გადააგვარა ქვეყნის ეკონომიკა. სამწუხაროდ, ძალიან დიდი დარტყმა მიიღო ჩვენმა კუთხემ და სწორედ მან უნდა იკისროს ავანგარდის როლი სახელმწიფოსთვის, დემოკრატიისა და ადამიანის თავისუფლებისათვის. სამტრედია ასოცირდება პროგრესთან და ჩვენ ეს უნდა გამოვიყენოთ,“- განაცხადა მიტროფანე სტურუამ.

მხარდაჭერებს „ლელოს“ გენერალურმა მდივანმა ბადრი ჯაფარიძემაც მიმართა. „ჩვენ არ გავუშვით ხელიდან შანსი, როდესაც დამოუკიდებლობა მოვიპოვეთ. ახლა კი გვაქვს შანსი, შევძლოთ და ქვეყანა რეალურად მოვაბრუნოთ დამოუკიდებლობისკენ. ამ ხელისუფლებამ ჩვენ დაგვაკარგვინა იმედი და საკუთარი თავის რწმენა. ეს ხელისუფლება გვინერგავს აზრს, რომ ჩვენ ვართ ერი, რომელსაც დამოუკიდებლად არაფრის გაკეთება არ შეუძლია, არადა, ჩვენ ვართ ერი, რომელიც მხოლოდ გამარჯვებასა და წინსვლას იმსახურებს. ჩვენ ვგრძნობთ პოლიტიკაში ყოფნის პასუხისმგებლობას და დამკვიდრებული აზრი, რომ პოლიტიკა ბინძურია, უნდა შევცვალოთ, რადგან პოლიტიკა კი არ არის ბინძური, არამედ ასეთი ხალხი მართავს დღეს პოლიტიკას. 2020-ში კი ხალხი სუფთა ხელებით უნდა მოვიდეს მმართველობაში. მხოლოდ ასეთი პოლიტიკა გამოიყვანს ჩვენს ქვეყანას გაჭირვებიდან, თითოეული თქვენგანის წვლილი კი ამ ბრძოლაში შეუცვლელია,“- აცხადებს ბადრი ჯაფარიძე.

„ლელოს“ ერთ-ერთი ლიდერის, გიგლა მიქაუტაძის თქმით, ქვეყანაში ბევრი ნიჭიერი ადამიანია, მაგრამ ისინი სახლში სხედან ან მუშაობენ კაპიკებზე. „გაუნათლებელი ადამიანები კი დღეს სახელმწიფო სტრუქტურებში არიან, რომლებსაც არც ცოდნა აქვთ და არც სურვილი, შეცვალონ ქვეყანა. 8 წელია ვუყურებთ, რომ ისინი ჩვენი ხალხისთვის კი არ იბრძვიან, არამედ მხოლოდ თავიანთი თავისთვის. ამიტომ დამთავრდა ეს დრო და ჩვენ ხელში უნდა ავიღოთ ჩვენი ქვეყნის მმართველობა,“ - აღნიშნა მიქაუტაძემ.

„ლელოს“ერთ-ერთი ლიდერის, ანა ნაცვლიშვილის თქმით, „ლელო“ არის ახალი ძალა, რომელიც ახალ სიცოცხლეს მოუტანს ქართულ ეკონომიკას, ქართულ კულტურას, განათლებასა და სოფლის მეურნეობას.„ისე უნდა ვიცხოვროთ დღეს, რომ მომავალ თაობას კითხვები არ გაუჩნდეთ, თუ რას ვაკეთებდით ჩვენი ქვეყნისთვის, როდესაც გადამწყვეტი არჩევანი დგებოდა. რა პერსპექტივას სთავაზობს ჩვენი ხელისუფლება ჩვენს ახალგაზრდებს, გარდა იმისა, რომ მან ჩვენი მომავალი თაობა უმუშევრობისათვის, ქუჩისთვის და აზარტული თამაშებისთვის გაწირა. ჩვენ კი ეს უნდა შევცვალოთ ოქტომბერში“, - აცხადებს ანა ნაცვლიშვილი.

„ლელოს“ ერთ-ერთი ლიდერი, გრიგოლ გეგელია მიიჩნევს, რომ სამტრედიაში ცვლილების და პროგრესის განწყობაა და სწორედ ეს გაიმარჯვებს ოქტომბერში.„ ეს ხელისუფლება არ გვაძლევს იმედს. პირიქით, გვეუბნება, რომ არ შეგვიძლია წინსვლა, განვითარება; არ შეგვიძლია, ქვეყანაში დავამარცხოთ უმუშევრობა და შიმშილი. მაგრამ ჩვენ მათ უნდა ვუთხრათ არა და ეს მონათმფლობელობა დავასრულოთ,“- აღნიშნა გრიგოლ გეგელიამ.

ამასთან, „ლელოს“ პოლიტსაბჭოს წევრმა თამთა შავგულიძემ სამტრედიელ მოსახლეობას მიმართა და აღნიშნა, რომ მან ადგილობრივებში სიახლის მზაობა აღმოაჩინა, რაც იმაზე მიუთითებს, რომ მათი ხელისუფლებაში მოსვლის დრო მოდის, ქართველი ხალხი აიღებს ხელში მმართველობას და „ლელო“იქნება მისი შუამავალი."

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს