რაჭაში, სტიქიის ზონაში ამ ეტაპზე რაიმე საფრთხე არ გვემუქრება. შესაბამისად, მოსახლეობა და ჩვენც მშვიდად უნდა ვიყოთ, - გარემოს ეროვნული სააგენტოს გეოლოგიის დეპარტამენტის უფროსმა მერაბ გაფრინდაშვილმა „ინტერპრესნიუსს" ონში განუცხადა.
მისივე განმარტებით, უწყებები ინტენსიურ რეჟიმში აწარმოებენ შესაბამის სამუშაოებს სტიქიის შედეგად მიყენებული პრობლემების აღმოსაფხვრელად.
„ჩვენი მხრიდან დღეს დილით, სტიქიის ზონის შემოვლის ერთ-ერთ მიზანს წარმოადგენდა ის, ხომ არ იყო რაიმე საფრთხე. არცერთ შენაკადში არ დაფიქსირებულა წყლის შეგუბება, რომელმაც შესაძლოა, უარყოფითი ზემოქმედება მოახდინოს გარემოსა და ინფრასტრუქტურაზე. ასევე მეწყრული ფერდობები დასტაბილურდა. მდინარის დონემ მნიშვნელოვნად იკლო", - განაცხადა გაფრინდაშვილმა.