ირანში კორონავირუსით დაღუპულთა საერთო რაოდენობა ოფიციალურ მონაცემზე სამჯერ მეტია, - ამის შესახებ ინფორმაციას BBC-ი ანონიმურ წყაროზე დაყრდნობით ავრცელებს.

წყარომ გამოცემას ხელისუფლების ჩანაწერები მიაწოდა, რომლის თანახმადაც, 20 ივლისის მონაცემებით ირანში კოვიდ 19-ს 42 000 ადამიანის სიცოცხლე ემსხვერპლა, ქვეყნის ჯანდაცვის სამინისტროს ოფიციალური ინფორმაციით კი, იმ დროისთვის ვირუსით დაღუპულთა რაოდენობა 14 405 იყო.

ამავე ჩანაწერების თანახმად, ირანში 20 ივლისისთვის კორონავირუსით ინფიცირებულთა რაოდენობა 451 024-იყო, რაც ოფიციალურ მონაცემებზე თითქმის ორჯერ მეტია.

BBC-ი წერს, რომ ანონიმური წყაროს მიერ მიწოდებული მონაცემები შეიცავს დეტალებს ქვეყნის საავადმყოფოებში შეყვანილი პაციენტების შესახებ, მათ შორის ინფორმაციას მათი სახელების, ასაკის, სქესის, სიმპტომების, საავადმყოფოებში გატარებული პერიოდის, თანხმლები დაავადებების შესახებ.

ცნობისათვის, ირანში კორონავირუსის პირველი შემთხვევა მიმდინარე წლის 22 იანვარს დადასტურა. ოფიციალური მონაცემებით, ქვეყანაში კოვიდ 19-ით ინფიცირების 309 437-ზე მეტი შემთხვევაა დადასტურებული, დაღუპულთა რაოდენობა კი 17 000-ს აჭარბებს.