აჭარის უმაღლეს საბჭოში „ერთიანი ნაციონალური მოძრაობის" წევრი გია აბულაძე ხელისუფლებას ტყუილში ადანაშაულებს. როგორც აბულაძე აცხადებს, თურქეთთან საზღვრის გახსნა და მოქალაქეების მეზობელ ქვეყანაში დასაქმება სიცრუე აღმოჩნდა.
მისივე თქმით, თურქეთში დასაქმებულმა მოქალაქეებმა ხელისუფლებისგან დაპირებული 300 - ლარიანი დახმარებაც ვერ მიიღეს.
„თურქეთიდან მოწვევის მიღების შემდეგ, მოქალაქე ნოტარიუსთან თარგმანის დასამოწმებლად რამდენიმედღიან რიგში უნდა იდგეს, რის შემდეგაც, როცა ატვირთავს დოკუმენტებს ელექტრონულად, მთავრობა პასუხს გასცემს მოქალაქეს ერთი კვირის განმავლობაში. ეს ბიუროკრატიული ბარიერები, რომელიც დროშია გაწელილი, რა თქმა უნდა, შეუძლებელს ხდის დასაქმებას, რადგან დამსაქმებელი 10-15 დღეს არ დაელოდება დასასაქმებელ პირს.
აქ ამბობენ, რომ საქართველოში დაბრუნების შემდეგ მოქალაქეებმა უნდა გაიარონ ორკვირიანი კარანტინი, რაზეც ბიუჯეტიდან დაიხარჯება თითოეულ მოქალაქეზე დაახლოებით 1000 ლარამდე და თუ ამ თანხას ხელისუფლება გადასცემს მოქალაქეებს, ისინი აღარ წავლენ სამუშაოდ თურქეთში და შესაბამისად, რისკებიც შემცირდება",- განაცხადა გია აბულაძემ.