საქართველოს მთავრობა გააგრძელებს აქტიურ მუშაობას იმისთვის, რომ ქვეყნის ოკუპაცია იყოს ჩვენი სტრატეგიული პარტნიორების დედაქალაქებში და ორგანიზაციებში ყოველთვის, ყველაზე აქტუალური საკითხი, სანამ საბოლოო ჯამში არ მოხდება ქვეყნის მშვიდობიანი დეოკუპაცია, - ამის შესახებ საქართველოს პრემიერ-მინისტრმა გიორგი გახარიამ მთავრობის სხდომის დაწყებისას განაცხადა.
გიორგი გახარია გამოეხმაურა გუშინ ჩატარებულ გაერო-ს უშიშროების საბჭოს დახურულ სხდომას და საქართველოს სტრატეგიულ პარტნიორებს მხარდაჭერისთვის მადლობა გადაუხადა.
„მოგეხსენებათ, გუშინ გაერო-ს უშიშროების საბჭოს დახურულ სხდომაზე საქართველოს სტრატეგიული პარტნიორი ქვეყნების მხარდაჭერით იქნა განხილული მდგომარეობა საქართველოში, რომელიც ეხებოდა 12 წლის განმავლობაში საქართველოს ოკუპაციას რუსეთის მიერ. აქ კიდევ ერთხელ იქნა მკაფიოდ დაფიქსირებული მხარდაჭერა როგორც საქართველოს ტერიტორიული მთლიანობის, ასევე ქვეყნის დეოკუპაციის აუცილებლობის. მინდა ჩვენს სტრატეგიულ პარტნიორებს, ევროპელ პერტნიორებს, ამერიკის შეერთებულ შტატებს, ბელგიას, ესტონეთს, საფრანგეთს, გერმანიას, დიდ ბრიტანეთს, ირლანდიას და ნორვეგიას მადლობა გადავუხადო უშიშროების საბჭოს დახურულ სხდომაზე მკაფიოდ დაფიქსირებული პოზიციისთვის, რომ საქართველო არის ოკუპირებული და რომ ჩვენ ყველამ ერთად ყველაფერი უნდა გავაკეთოთ მშვიდობიანი დეოკუპაციისთვის. გარდა ამისა, მინდა კიდევ ერთხელ ხაზგასმით აღვნიშნო, რომ საქართველოს მთავრობა გააგრძელებს აქტიურ მუშაობას იმისთვის, რომ ქვეყნის ოკუპაცია იყოს ჩვენი სტრატეგიული პარტნიორების დედაქალაქებში და ორგანიზაციებში ყოველთვის, ყველაზე აქტუალური საკითხი, მუდმივად აქტუალური საკითხი, სანამ საბოლოო ჯამში არ მოხდება ქვეყნის მშვიდობიანი დეოკუპაცია“, - განაცხადა გახარიამ.