პოლიტიკური გაერთიანება „ლელო საქართველოსთვის“ ლიდერის, მამუკა ხაზარაძის განცხადებით, ე.წ საზღვრის პირას არსებულ 70 სოფელში „ლელო“ სერიოზულ ცვლილებებს შეიტანს, იმისთვის, რათა ეს სოფლები იყოს მატერიალურად და ტექნიკურად აღჭურვილი და მოსახლეობამ იგრძნოს, რომ მათ უკან დგას სახელმწიფო.

„დღევანდელი დღე ძალიან მძიმეა ჩვენი ქვეყნისთვის. 12 წლის წინათ მართლა დიდი ტრაგედია მოხდა.

მე მინდა გითხრათ „ლელოს“ პოზიცია, რომ იმ 70 სოფელში, რომელიც ე.წ საზღვრის პირას არის, „ლელო“ შეიტანს ძალიან სერიოზულ ცვლილებას და ეს 70 სოფელი იქნება ძალიან სერიოზულად მატერიალურად, ტექნიკურად აღჭურვილი, რათა მოსახლეობამ იგრძნოს, რომ მათ უკან დგას სახელმწიფო. ამისთვის, ჩვენ გვაქვს საკმაოდ სერიოზული პაკეტი, რომ ბრძოლის წინა ხაზზე მდგომი თითოეული ადამიანი, ახალგაზრდა, მოხუცი გრძნობდეს, რომ ის სხვანაირი მხარდაჭერით არის უზრუნველყოფილი სახელმწიფოს მხრიდან, ფინანსურად, მატერიალურად, ტექნიკურად. იქ ცხოვრება დღეს არის გმირობის ტოლფასი. ჩვენ არც ერთ გოჯ მიწას არ დავთმობთ. პირველ რიგში, ეს იქნება პირველი ნაბიჯი და ჩვენება, რომ ნებისმიერი გოჯ მიწაზე, რომელზეც იქნება შეხება ჩვენი ოკუპანტის მხრიდან, იქნება საკმაოდ სერიოზული რეაგირება, დიპლომატიური იქნება ეს პროტესტი თუ ნებისმიერი სხვა ფორმა,“- განაცხადა მამუკა ხაზარაძემ.