უკანონოდ განლაგებული საოკუპაციო ძალებისა და საქართველოს რეგიონების მცოცავი ანექსიის გზით რუსეთის მიერ წარმოებული უწყვეტი პროვოკაციები საერთაშორისო კანონმდებლობას და ევროკავშირის შუამავლობით გაფორმებულ 2008 წლის 12 აგვისტოს „ცეცხლის შეწყვეტის შეთანხმებას“ უხეშად არღვევს, - ამის შესახებ ლიეტუველმა ევროპარლამენტარმა ანდრიუს კუბილიუსმა განაცხადა.
აგვისტოს ომიდან 12 წლისთავს ევროპარლამენტარი სოციალურ ქსელ „ტვიტერში“ გამოეხმაურა.
მისივე თქმით, რუსეთმა საქართველოსგან, როგორც წარმატებული ევროპული რეფორმების განხორციელების კუთხით მისაბაძი ქვეყნიდან, მაგალითი უნდა აიღოს.
„იმპერიალისტული რუსეთის ეს გზა განწირულია. რუსეთისთვის ერთადერთი ევროპული გზა საქართველოსგან მაგალითის აღებაა, რომელიც წარმატებული ევროპული რეფორმების განხორციელებით მისაბაძია“, – წერს კუბილიუსი.