დმანისის მუნიციპალიტეტის მერი გიორგი ტატუაშვილი აცხადებს, რომ პარტია ,,ქართული ოცნებიდან“ მისი გარიცხვის თაობაზე, ინფორმაცია პრესიდან შეიტყო.

როგორც ,,ინტერპრესნიუსთან“ გიორგი ტატუაშვილმა განაცხადა, ის აღნიშნულ გადაწყვეტილებასთან დაკავშირებით, საქმის კურსში არავის ჩაუყენებია და მას პარტიის სამდივნოდან არავინ შეხმიანებია.

,,ჟურნალისტებმა დამირეკეს და მხოლოდ მაშინ გავიგე, რომ პარტიიდან გამრიცხეს, შემდეგ კი ,,ინტერპრესნიუსზე“ ვნახე ოფიციალური განცხადება. რომელი კანდიდატის მხარდაჭერაზეა საუბარი მე ვერ გეტყვით, ვინც განცხადება გაავრცელა იმას უნდა ჰკითხოთ. ლოგიკურია, ხო თუ განცხადებას ავრცელებ, უნდა დააკონკრეტო, რომელი კანდიდატის მხარდაჭერაზე საუბრობენ“, - განაცხადა გიორგი ტატუაშვილმა ,,ინტერპრესნიუსთან“ საუბარში.

შეკითხვაზე, პარტიიდან გარიცხვის შემდეგ რჩება თუ არა ის დმანისის მუნიციპალიტეტის მერის პოსტზე, გიორგი ტატუაშვილი აცხადებს, რომ რჩება.