დაავადებათა კონტროლის ეროვნული ცენტრის ხელმძღვანელის ამირან გამყრელიძის განცხადებით, ყაზბეგში კორონავირუსის შემთხვევების გარკვეული მატება არის, თუმცა მათი კონტაქტები იდენტიფიცირებულია.
როგორც ამირან გამყრელიძე ამბობს, მიმდინარეობს ინტენსიური თერმოსკრინინგი.
„სამი სოფელია, სადაც ინფიცირებული, საზღვარზე მომუშავე საპატრულო პოლიციის თანამშრომელები ადგილობრივები იყვნენ, სტეფანწმინდიდან და კიდევ ორი სოფლიდან. ამ ორი სოფლის ინტენსიური თერმოსკრინინგი დაიწყო. ის, რაც ახლა სოციალურ ქსელებში ვრცელდება, რომ იკეტება ყაზბეგის, სტეფანწმინდის მუნიციპალიტეტი, ან მკაცრი საკარანტინო ზომები უნდა გატარდეს, სინამდვილეს არ შეესაბამება. არის შემთხვევების გარკვეული მატება, რომელთაც კონტაქტი არ ჰქონიათ ბევრი, ყველა კონტაქტი იდენტიფიცირებულია და მათი ტესტირება მოხდა“, - განაცხადა ამირან გამყრელიძემ „საზოგადოებრივ მაუწყებელთან“.