მცხეთა-მთიანეთში მაჟორიტარი დეპუტატობის კანდიდატი შალვა კერესელიძე დუშეთის მუნიციპალიტეტის დაბა ჟინვალის და სოფელ არანისის მოსახლეობას შეხვდა.
როგორც კანდიდატის პრესსამსახურიდან „ინტერპრესნიუსს“ აცნობეს, საარჩევნო კამპანიის ფარგლებში „ქართული ოცნების“დეპუტატობის კანდიდატმა ამომრჩეველს საკუთარი გეგმები გააცნო და პრობლემები მათგან პირადად მოისმინა.
მაჟორიტარი დეპუტატობის კანდიდატი დევნილთა დასახლებაშიც იმყოფებოდა, წილკანში და წეროვანში შალვა კერესელიძე იძულებით გადაადგილებულ პირებს შეხვდა.
მოსახლეობამ შალვა კერესელიძეს წილკნის და წეროვანის დამაკავშირებელი გზის რეაბილიტაცია სთხოვა. დეპუტატობის კანდიდატის განცხადებით, აღნიშნული პრობლემა ორი სოფლის მოსახლეობას წლის ბოლომდე მოუგვარდება.
„წეროვანში და წილკანში სახელმწიფოს მხრიდან გასულ და მიმდინარე წელსაც მსხვილი პროექტები განხორციელდა, მოწესრიგდა სანიაღვრე არხები, მოეწყო სკვერები, აშენდა საბავშვო ბაღები, გზებს ჩაუტარდა რეაბილიტაცია. შეხვედრების დროს მოსახლეობა დადებითად არის განწყობილი. ისინი სახელმწიფოსგან მხარდაჭერას გრძნობენ,“-განაცხადა შალვა კერესელიძემ.