მცხეთის რაიონულ სასამართლოში გიორგი შაქარაშვილის გარდაცვალების საქმეში ბრალდებული არასრულწლოვნების პროცესი გადაიდო. პროცესის გადადების მიზეზი ერთ-ერთი არასრულწლოვნის, ზ.ხ.-ს ჯანმრთელობის მდგომარეობის გაუარესება გახდა. მანამდე სხდომა პროტესტის ნიშნად დატოვა არასრულწლოვნის ადვოკატმა გიორგი გელხაურმა.
ამასთან, კიდევ ერთი არასრულწლოვნის ნ.ც.-ს ადვოკატის არჩილ ბერიანიძის განცხადებით, დღევანდელ პროცესზე ვერცერთი მოწმის დაკითხვა ვერ მოხერხდა და შემდეგი სხდომა 26 აგვისტოს, 14:00 საათზე გაიმართება.
„არასრულწლოვანი ზ.ხ არის შეუძლოდ, რის გამოც მან ფიზიკურად ვერ მოახერხა სასამართლო პროცესზე დასწრება. დღევანდელი სხდომა გადაიდო და ვერ მოხერხდა ვერცერთი მოწმის დაკითხვა. პროცესი 26 აგვისტოს, 14.00 საათზე გაგრძელდება”, - განაცხადა არჩილ ბერიანიძემ.