სიღნაღისა და ახმეტის მუნიციპალიტეტებში დატბორილი გზების გაწმენდითი სამუშაოები მიმდინარეობს
კახეთში მოსული უხვი ნალექის შედაგად, რამდენიმე მუნიციპალიტეტში პრობლემები შეიქმნა.
როგორც „ინტერპრესნიუსს“კახეთის სახელმწიფო რწმუნებულის ადმინისტრაციიდან აცნობეს, კახეთის სახელმწიფო რწმუნებულის მოვალეობის შემსრულებელი, ირაკლი შიოშვილი სიღნაღისა და ახმეტის მუნიციპალიტეტებში იმყოფებოდა, სადაც მძიმე ტექნიკის მეშვეობით აქტიურად მიმდინარეობს წყალდიდობის შედეგად დატბორილი გზების გაწმენდითი სამუშაოები.
მათივე ინფორმაციით, ირაკლი შიოშვილმა ახმეტის მუნიციპალიტეტის მერის მოადგილესთან, ვაჟა ნასყიდაშვილთან ერთად, სოფელ კასრისწყალში საჯარო სკოლის შენობა დაათვალიერა, რომლის სარდაფი და სკოლის ეზოში მდებარე სველი წერტილები უხვი ნალექის დროს დაიტბორა. წყლის ამოტუმბვითი სამუშაოების ჩატარების შედეგად, საჯარო სკოლის ეზო და პირველი სართული გაწმენდილია.
