თელავის რაიონულმა სასამართლომ ოჯახში ძალადობის ბრალდებით დაკავებული თელავის საკრებულოს დეპუტატი, მიხეილ გრემელაშვილი პატიმრობაში დატოვა.

გრემელაშვილის საქმეზე წინა სასამართლო სხდომა, მოსამართლე თამარ კაპანაძემ განიხილა.

პროცესზე, გრემელაშვილის უფლებადამცველმა, ზურაბ ბელთაძემ გრემელაშვილის 50 ათას ლარიანი გირაოს სანაცვლოდ გათავისუფლება მოითხოვა, თუმცა მოსამართლემ განმარტა, რომ ახალი დანაშაულის ჩადენის საფრთხე არსებობს, რის გამოც აღკვეთის ღონისძიება არ შეცვალა.

სხდომას თავდაპირველად ესწრებოდა თავად ბრალდებულიც, თუმცა მოსამართლის გადაწყვეტილებას ხმაურით შეხვდა და დარბაზიდან გაიყვანეს.

სახელმწიფო ბრალდება გრემელაშვილს ოჯახში ძალადობას, ოჯახის წევრების მიმართ მუქარასა და ცეცხლსასროლი იარაღის უკანონო შეძენა-შენახვას ედავება. ის ოჯახის წევრების მიმართ მუქარის, ოჯახში ძალადობის, ცეცხლსასროლი იარაღისა და საბრძოლო მასალის უკანონო შეძენა-შენახვის ბრალდებით 8 ივლისს დააკავეს. გრემელაშვილს 4-დან 6 წლამდე ვადით თავისუფლების აღკვეთა ემუქრება.