გიორგი შაქარაშვილის საქმეზე დაკავებული არასრულწლოვანი ზ.ხ. სასამართლო სხდომას პროტესტის ნიშნად კვლავ არ ესწრება.

როგორც სასამართლო პროცესის დაწყებამდე ჟურნალისტებს ზ.ხ.-ს საზოგადოებრივმა ადვოკატმა მურმან ნიკოლეიშვილმა განუცხადა, ის საქმის მასალებს გაეცნო და პროცესში მონაწილეობას მიიღებს.

„წინა პროცესის შემდეგ, მას ფიზიკურად ვერ შევხვდი, რადგან არასამუშაო დღეები იყო. მან შეწყვიტა თუ არა პროტესტი, ეს ინფორმაცია არ მაქვს. საქმის მასალებს გავეცანი და პროცესში მივიღებ მონაწილეობას. ჩემი დაცვის ქვეშ მყოფის პოზიცია ვიცი, ის ბრალს არ აღიარებს, სასამართლოს უნდობლობას უცხადებს. მას ჩემი საქმეში ჩართვის აუცილებლობა ავუხსენი", - განაცხადა ნიკოლეიშვილმა.

ცნობისთვის, გიორგი შაქარაშვილის საქმეზე დაკავებული არასრულწლოვნების ნაწილს ძალადობას, ჯგუფური ძალადობის ორგანიზებას, მასში მონაწილეობასა და თავისუფლების უკანონო აღკვეთას ედავებიან.