დონალდ ტრამპი ქალაქ კენოშას ეწვია და სამართალდამცავების მიმართ მხარდაჭერა გამოხატა.
აშშ-ის პრეზიდენტი დონალდ ტრამპი უისკონსინის შტატის ქალაქ კენოშას ეწვია, სადაც 23 აგვისტოს პოლიციის მიერ ფერადკანიანი მამაკაცის დაჭრას საზოგადოების მხრიდან პროტესტი მოჰყვა.
პრეზიდენტმა საპროტესტო აქციების დროს დაზიანებული ადგილები, მათ შორის ავეჯის დამწვარი მაღაზია, მოინახულა და ადგილობრივ ბიზნესმენებს შეხვდა.
„ეს არ არის მშვიდობიანი პროტესტის ქმედებები, ეს არის საშინაო ტერორი,“- აღნიშნა დონალდ ტრამპმა ბიზნესმენებთან შეხვედრაზე.
პრეზიდენტის თქმით, მისი ადმინისტრაცია არეულობების დროს დაზიანებული კენოშას ბიზნესის დასახმარებლად 4 მილიონ აშშ დოლარს, ქალაქის სამართალდამცავებისთვის კი - 1 მილიონ აშშ დოლარს გამოყოფს.
შეგახენებთ, ქალაქ კენოშაში საპროტესტო გამოსვლები მას შემდეგ დაიწყო, რაც 29 წლის ფერადკანიან მამაკაცს, ჯეიკობ ბლეიქს, პოლიციამ დაკავებისას შვიდჯერ ესროლა. სროლის შედეგად ბლეიქი მძიმედ დაიჭრა. ის ჯერჯერობით პარალიზებულია.