ბათუმში ავტობუსის მძღოლის ინფიცირების წყარო უცნობია, აღნიშნული შემთხვევა გეგმური შემოწმებისას გამოვლინდა, - ამის შესახებ აჭარის საზოგადოებრივი ჯანდაცვის ცენტრის დირექტორის მოადგილემ, ნონა ეფაძემ ჟურნალისტებს განუცხადა.

მისი ინფორმაციით, მძღოლთან კონტაქტში მყოფი ორი თანამშრომელი და ოჯახის წევრები თვითიზოლაციაში იმყოფებოდნენ.

„გასული 24 საათის განმავლობაში აჭარაში 6 ახალი შემთხვევა დაფიქსირდა. აქედან ორი უკვე გუშინვე გაჟღერდა. ერთი იყო მუნიციპალური ავტობუსის მძღოლი, ხოლო მეორე კი სასტუმრო „ოაზისის" სტუმარი. დანარჩენი ოთხი შემთხვევა, ეს გახლავთ: სატვირთო ავტომობილის მძღოლი, უცხოელი, რომელიც დაბრუნდა სამკურნალოდ თავის ქვეყანაში. ერთი საკარანტინო სივრციდან, ერთი ე.წ. დონას კლასტერიდან კონტაქტირებული პირი, ერთმა კი ჩივილებით მიმართა „ცხელების ცენტრს".

აჭარაში მიმდინარეობს გაფართოებული ტესტირება როგორც მიზნობრივი ჯგუფების, ასევე დაინტერესებული პირებისათვის.

დადასტურებული შემთხვევის ახლო კონტაქტები გადაყვანილი არიან საკარანტინო სივრცეში“, - განაცხადა ნონა ეფაძემ.