ბიზნეს ასოციაცია - ველით პარლამენტის გადაწყვეტილებას შრომის კანონმდებლობაში ცვლილებებთან დაკავშირებით და იმედი გვაქვს, რომ ის დაბალანსებული იქნება

საქართველოს ბიზნეს ასოციაცია ეხმიანება შრომის კანონმდებლობაში ცვლილებების პროექტს, რომელიც საქართველოს პარლამენტმა მიმდინარე პლენარული სესიის ფარგლებში მეორე მოსმენით უნდა მიიღოს. მათი განცხადებით, შრომის კოდექსსა და შრომის ინსპექციის შესახებ კანონში რამოდენიმე მნიშვნელოვანი პრინციპი შემოდის, რაც, ერთი მხრივ, დასაქმებულთა უფლებრივ მდგომარეობას მნიშვნელოვნად გააუმჯობესებს, მეორე მხრივ კი თითქმის სრულად დააკმაყოფილებს ევროკავშირთან ასოცირების პროცესში აღებულ ვალდებულებებს.

ამასთან, ბიზნეს ასოციაციაში ამახვილებენ ყურადღებას საკანონმდებლო ცვლილებების პაკეტში დარჩენილ ორ წინააღმდეგობრივ საკითხზე. კერძოდ, ზეგანაკვეთური სამუშაოს ანაზღაურების ლიმიტის მკვეთრ ზრდასა და შრომის ინსპექციის მანდატის განუსაზღვრელ გაფართოებაზე.

„როგორც კანონმდებლები, ასევე დამსაქმებლები პირნათელნი უნდა ვიყოთ იმ ადამიანების წინაშე, ვინც საკმაოდ რთულ ეკონომიკურ ვითარებაში შრომობს და თავისი მოკრძალებული წვლილი შეაქვს საკუთარი ოჯახის კეთილდღეობაში, ბიზნესისა და ქვეყნის შენებაში; არ შეიძლება ამ ადამიანებს შევუქმნათ არასწორი მოლოდინები, მივიღოთ იმგვარი გადაწყვეტილებები, რაც განწირულია შეუსრულებლობისათვის ან კიდევ უფრო უარესი, დამატებით პრობლემებს შეუქმნის ბიზნესსაც, დასაქმებულებსაც და ეკონომიკასაც. მაგალითად, თუ ჩვენ შემოვიღებთ ზეგანაკვეთური შრომის ანაზღაურების მკვეთრად გაზრდილ მოთხოვნებს, ბიზნესი იძულებული იქნება თავი აარიდოს გაზრდილ ხარჯებს, მაგალითად, მაღალი ალბათობით, შესაძლოა, დაიყოს შტატები, შემცირდეს სამუშაო დრო და შემცირდეს ფიქსირებული ხელფასები. ამასთან, თუ ჩვენ განუსაზღვრელი უფლებამოსილებებით აღვჭურვავთ შრომის ინსპექციას, ბიზნესი, განვითარებასა და კრიზისთან გამკლავებაზე ფიქრის ნაცვლად, იძულებული იქნება ადმინისტრაციულ ორგანოსთან ხანგრძლივ დავებში ხარჯოს დრო და ენერგია, შრომის ინსპექცია კი დაშორდება მის ძირითად ფუნქციას - აკონტროლოს სამუშაო ადგილებზე შრომის უსაფრთხოების პირობები, რაც ასე კრიტიკულია და რაზეც დამოკიდებულია არაერთი დასაქმებულის სიცოცხლე და ჯანმრთელობა.

უნდა გვესმოდეს, რომ ნებისმიერ გადაწყვეტილებას, მათ შორის, შრომის კანონმდებლობის რადიკალურ ცვლილებას, ბუნებრივია, ექნება როგორც დადებითი, ასევე, უარყოფითი მხარეები. თუმცაღა, არ უნდა დავუშვათ, რომ ამა თუ იმ ცვლილებამ თუ გადაწყვეტილებამ ნეგატიური გავლენა იქონიოს შრომის ბაზარსა და ქვეყნის ბიზნესსა და ეკონომიკაზე. მსგავსი გადაწყვეტილებების მიღებისას ასევე უნდა გავითვალისწინოთ ის არსებული ფონი, რაც პანდემიის გამო გლობალურად და, მათ შორის, საქართველოში გვაქვს“, - განაცხადა საქართველოს ბიზნეს ასოციაციის პრეზიდენტმა სოსო ფხაკაძემ.

მისივე თქმით, საჭიროა სწორი ბალანსის დაცვა და კომპრომისი.

„მთელი ამ ხანგრძლივი პერიოდის განმავლობაში საქართველოს ბიზნეს ასოციაციამ, ისევე როგორც სხვა შემთხვევებში, კონსტრუქციულ და პროფესიულ ფორმატში იმუშავა შესაბამის უწყებებთან და გაიზიარა დაგეგმილი ცვლილებების აბსოლუტური უმრავლესობა. თუმცაღა აშკარაა, რომ ეს დარჩენილი 2 (ორი) წინააღმდეგობრივი საკითხი საფრთხეების შემცველია და ვფიქრობთ, რომ ჩვენ არ გვაქვს ექსპერიმენტების კეთების ფუფუნება. მით უფრო ისეთის, რომელიც არათუ არ გააუმჯობესებს დასაქმებულების მდგომარეობას, არამედ დააზიანებს მათ ინტერესებს და შესაბამისად დააზიანებს ეკონომიკას. დარწმუნებულნი ვართ, რომ საკანონმდებლო ორგანო მართებულად შეაფასებს არსებულ რეალობას და მიიღებს დაბალანსებულ გადაწყვეტილებას შრომის კანონმდებლობაში ცვლილებებთან დაკავშირებით“, - განაცხადა სოსო ფხაკაძემ.

რამაზ საყვარელიძე - თუ მრავალპარტიულობა ხელოვნურია, საარჩევნო დონეზე შესაძლოა მას ჰქონდეს შედეგი, მაგრამ რეალური მრავალპარტიულობა მაინც არ გვექნება და გადაწყვეტილებების მიმღები ერთი პარტია იქნება
ქართული პრესის მიმოხილვა 21.10.2021
დავით სიხარულიძე - ქართულ-ამერიკული თანამშრომლობა ყოველთვის იყო დაფუძნებული ორ ქვეყანას შორის სტრატეგიულ თანამშრომლობაზე, აშშ-ს მდივნის ვიზიტიც ამის მკაფიო დემონსტრირება გახლდათ
კოლიერსის საოფისე სერვისების პოსტპანდემიური ტრანსფორმაცია
ევროპის საინვესტიციო ბანკმა ტერაბანკს გრძელვადიანი საკრედიტო რესურსი გამოუყო
LEXUS-ი წარმოგიდგენთ უახლეს ფლაგმან მოდელს LX 600
ჩაირთე „სილქფესტი“ და ისარგებლე ულიმიტო ინტერნეტით და სასაუბრო წუთებით უსასრულოდ, მთელი თვის განმავლობაში
„მიჰაუსში“ გრანდიოზული ფასდაკლება დაიწყო
„ჯიპიაი ჰოლდინგმა“ და „ჯი ეს ემ ტრანსმა“ თანამშრომლობის მემორანდუმი გააფორმეს