ინოვაციების და ტექნოლოგიების სააგენტომ საქართველოს 11 უმაღლესი სასწავლებლისა და რეგიონში GITA - ს ინოვაციური ცენტრების პრეაქსელერატორის მენეჯერებისთვის გადამზადების კურსი დაიწყო.
როგორც „ინტერპრესნიუსს“ საქართველოს ინოვაციების და ტექნოლოგიების სააგენტოდან აცნობეს, სამდღიან ტრენინგს ჰაიტექ ანტრეპრენერი დავით ჩეჩელაშვილი და 500 Startups - ის ევროპისა და აფრიკის რეგიონალური ხელმძღვანელი პედრო ვიეირა გაუძღვებიან.
კურსი მოიცავს შემდეგ საკითხებს: აქსელერაციის პროცესის როლი სტარტაპ ეკოსისტემაში, სტრატეგია და შემდგომი ნაბიჯები. ტრენინგის განმავლობაში მონაწილეები თეორიული ცოდნის მიღებასთან ერთად პრაქტიკულ სამუშაოებსაც შეასრულებენ.
მათივე ინფორმაციით, კურსის მიზანია ანტრეპრენერობის პოპულარიზაცია და ხარისხის გაზრდა უმაღლეს სასწავლებლებში. ტრენინგი დაეხმარება მენეჯერებს, პრეაქსელერაციის პროცესი უფრო ეფექტურად წარმართონ უნივერსიტეტებსა და ინოვაციურ ცენტრებში.