არიან პოლიტიკური სუბიექტები, ვისაც მიაჩნია, რომ მორალს სჯობს და მასზე უპირატესია სხვა მიზნის მიღწევა, მათ შორის ბიზნეს მიზნების მიღწევაც,- ამის შესახებ პარლამენტის პირველმა ვიცე-სპიკერმა გია ვოლსკიმ კახა ოქრიაშვილისა და გაერთიანებული ოპოზიციის თანამშრომლობის კომენტირებისას განაცხადა.

მისივე თქმით, „ნაციონალურ მოძრაობას“ უამრავი დანაშაული აქვს ჩადენილი და ეს ყველას უნდა ესმოდეს, ვინც მასთან თანამშრომლობს ან მომავალში ითანამშრომლებს.

„ვფიქრობ, სია დანაშაულებისა, რომელიც „ნაციონალურმა მოძრაობამ“ ჩაიდინა საქართველოს წინაშე არის ძალიან ვრცელი. ეს საკითხები არის ის, რომლის გათავისებაც ხდება ნებისმიერი პოლიტიკური სუბიექტის მიერ ვინც ზის იმ ეზოში და ვინც ახლა შეუერთდება და რაიმე სახის მემორანდუმზე მოაწერს ხელს „ნაციონალურ მოძრაობასთან". პოლიტიკაში მორალი არის ერთ- ერთი მთავარი ნიშანი, რათა საზოგადოებამ გადაწყვიტოს ვის დაუჭიროს მხარი. არიან პოლიტიკური სუბიექტები, ვისაც მიაჩნიათ, რომ მორალს სჯობს და მასზე უპირატესია სხვა მიზნის მიღწევა, მათ შორის, ბიზნეს მიზნების მიღწევაც. ეს საზოგადოებას არ უნდა დარჩეს ყურადღების მიღმა", - განაცხადა გია ვოლსკიმ.

ცნობისათვის, დეპუტატი კახა ოქრიაშვილი, „ძალა ერთობაშიას" შეუერთდა და შესაბამისი მემორანდუმიც გააფორმა.