აჭარის ჯანმრთელობისა და სოციალური დაცვის სამინისტროს რეკომენდაციით, ბათუმსა და ქობულეთში COVID 19-ზე უფასო PCR ტესტირებას უქმე დღეებში, 5 და 6 სექტემბერსაც ჩაატარებენ.

როგორც აჭარის ჯანდაცვის სამინისტროში განაცხადეს, ტესტირება ნებისმიერ მოქალაქეს ბათუმის N1 პოლიკლინიკაში, N4 პოლიკლინიკაში, საოჯახო მედიცინის რეგიონულ ცენტრში, თამარის დასახლების საოჯახო მედიცინის ცენტრში და „ევექსის“ ბათუმის ამბულატორიაში 10-დან 17:00 საათამდე შეეძლება. ასევე, მოქალაქეებს შესაძლებლობა ექნებათ უფასო ტესტი ქობულეთის მერიის შენობის მიმდებარედ ჩაიტარონ.

„საჭიროების შემთხვევაში ამავე პოლიკლინიკებში ჩაუტარდებათ ექიმის კონსულტაცია. კვლევა ჩვეულ რეჟიმში გაგრძელდება კარვებში, ბათუმის ბულვარის სამ ლოკაციაზე, კოლონადებთან, ანბანის კოშკთან, ქობულეთის მუნიციპალიტეტში მერიის შენობის მიმდებარედ. აქ მოქალაქეებს 11:00-დან 23:00 საათამდე მოემსახურებიან. აჭარის ა/რ ჯანმრთელობისა და სოციალური დაცვის სამინისტრო მოსახლეობას მიმართავს, ისარგებლონ კორონავირუსზე უფასო PCR ტესტირებით და ვირუსისთვის დამახასიათებელი სიმპტომების გამოვლენის შეთხვევაში დაუყოვნებლივ მიმართონ შესაბამის დაწესებულებებს", - აცხადებენ უწყებაში.