ბელარუსს ინკლუზიური ეროვნული დიალოგი სჭირდება, - ამის შესახებ ევროკავშირის უმაღლესმა წარმომადგენელმა საგარეო პოლიტიკისა და უსაფრთხოების საკითხებში ჯოზეფ ბორელიმ განაცხადა.
„კიდევ ერთხელ, შთამბეჭდავი მასობრივი დემონსტრაციები მინსკსა და სხვა ქალაქებში აჩვენებს ბელარუსი ხალხის გადაწყვეტილებას თავისუფლებების, უფლებებისა და დემოკრატიის მისაღწევად. ამ ყველაფერის - ბელარუსის ხელისუფლების მხრიდან დაპატიმრებების, დაშინების და ძალადობის მიუხედავად, საჭიროა ინკლუზიური ეროვნული დიალოგი,“ - წერს ჯოზეფ ბორელი სოციალურ ქსელ „ტვიტერში“.
შეგახსენებთ, ბელარუსში საპროტესტო აქციები 9 აგვისტოს ჩატარებული საპრეზიდენტო არჩევნების შემდეგ არ წყდება. საზოგადოების ნაწილი არჩევნების ოფიციალურ შედეგებს არ აღიარებს და პრეზიდენტ ლუკაშენკოს გადადგომას მოითხოვს. საპროტესტო აქციების დროს დაღუპულია სულ მცირე ოთხი და დაშავებულია ასობით ადამიანი.